出名的母嬰用品品牌「媽媽餵(Mamaway)」佇8月份發出一支Reel影片講配方奶的問題，煞隨隨佇網路著火燒，真濟人譬相講影片為著欲鼓勵人飼母奶，煞共配方奶講甲無一塊好，這款行為可能會造成無飼母奶的阿母，受著真大的社會道德壓力。到底母奶敢誠實遐爾重要？飼母奶、飼配方奶欲按怎選擇？又閣愛注意啥物幼項？這集邀請彰化基督教病院婦產科醫師莊羽豊，以一个醫師，同時也是一个阿母的角度，來分享伊的看法。就像佑仁佇節目中講的，毋但有紅嬰仔的阿母愛聽這集，所有朋友攏應該聽這集，思考咱敢會無意中對有紅嬰仔的阿母，有傷濟無必要的期待佮要求？